Հարությունյան քույրերին պարբերաբար նյութական օժանդակություն է ցուցաբերվում. անդրադարձ

Ստեփանակերտ քաղաքի Գրիգոր Լուսավորիչ 75 հասցեում բնակվող Հարությունյան քույրերի սոցիալ-կենցաղային պայմաններ չունենալու հարցը վերջերս լայն հնչեղություն է ստացել հանրության շրջանում:

ՍՏԵՓԱՆԱԿԵՐՏ, 5 սեպտեմբերի, ԱՐՑԱԽՊՐԵՍ: Հարցի   վերաբերյալ  «Արցախպրես»-ի  թղթակիցը   դիմել  է  ԱՀ աշխատանքի, սոցիալական և բնակարանային հարցերի նախարարություն:
ԱՀ աշխատանքի, սոցիալական և բնակարանային հարցերի նախարարի  խորհրդական  Անի  Թովմասյանն  ասել է, որ  իրենց  կառույցի   կողմից  դեռևս շաբաթներ առաջ  նախարար Միքայել Վիրաբյանի հանձնարարությամբ, հաշվի առնելով Հարությունյան  քույրերի   կեցության ծանր վիճակը և նրանցից  մեկի  հիվանդության փաստը, տրամադրվել  է 200 000 դրամ ֆինանսական  և  դրա  եռակի նյութական օժանդակություն։
«Դրա մասին չէինք  բարձրաձայնում՝ խուսափելով ակամայից ծանր վիճակում հայտնված քույրերին վիրավորելուց, բայց քանի որ թեման արդեն իսկ հասարակական հնչեղություն է ստացել, հարկ ենք համարում տեղեկացնել, որ մեր երկրի սոցիալական ոլորտի գլխավոր պատասխանատուն՝ Մ. Վիրաբյանը, նման դեպքեր լսելու պարագայում անձամբ է զբաղվում այդ խնդրով՝ դրա հետ մեկտեղ կարևորելով նաև առանձին անհատների և կազմակերպությունների կողմից օգնության ձեռք հասցնելը նման դժվար իրավիճակում հայտնված մեր հայրենակիցներին»,- մասնավորապես  ասել է  Ա. Թովմասյանը: 
ԿԻՍՎԵԼ