ՀՀ աշխատանքի և սոցիալական հարցերի նախարար Զարուհի Բաթոյանը և նախարարի տեղակալ Ժաննա Անդրեասյանն Արցախում են ճանաչողական այցով:
ՍՏԵՓԱՆԱԿԵՐՏ, 10 սեպտեմբերի, ԱՐՑԱԽՊՐԵՍ: ԱՀ Նախագահ Բակո Սահակյանի հետ հանդիպումից հետո այս մասին «Արցախպրես»-ի թղթակցի հետ զրույցում ասել է ՀՀ աշխատանքի և սոցիալական հարցերի նախարար Զարուհի Բաթոյանը:
Նախարարի խոսքով՝ ԱՀ նախագահի հետ քննարկել են տարբեր հարցեր, որոնք վերաբերվում են հիմնականում ժողովրդագրական իրավիճակի բարելավմանը, սոցիալական աջակցությանը, վերաբնակեցմանը և այլ ծրագրերի իրականացմանը:
«Հանդիպմանը քննարկել ենք նաև համատեղ իրականացվելիք ծրագրերը, խոսել՝ բարեփոխումների մասին, որոնք նախատեսում ենք իրականացնել ՀՀ-ում: Այս փուլում կարևոր էր համատեղ սկզբունքների քննարկումը, որովհետև կան ոլորտներ, որոնք միանման ծրագրերով ենք փորձում բարեփոխել, բայց կան նաև ոլորտներ, որոնք Արցախում այլ կերպ են իրականացվում: Այս այցը նաև փորձի փոխանակման նպատակ ունի»,-մասնավորապես ասել է Զ. Բաթոյանը:
Խոսելով համագործակցության մասին՝ նա ավելացրել է, որ երկու նախարարությունների միջև առկա է հաստատված գործողությունների ծրագիր, որի շրջանակներում էլ իրականացվում են համատեղ աշխատանքներ և քննարկումներ. դրանք կրելու են շարունակական բնույթ:
