Հոկտեմբերի 1-ը տարեցների միաջազգային օրն է: Տոնի առանձնանշումը կարևոր է իր խորհրդով. այն ավագ ու կրտսեր սերունդների միջև կապի ամրապնդման լավագույն երաշխիք է:Դա իրականում երախտագիտության ու նվիրաբերումի օր է: ԼՂՀ սոցիալական պաշտպանության ռազմավարությունից բխող ու գործող օրենսդրությունը վկայում է տարեցների վաստակի, դերի և մասնակցության կարևորումը մեր իրականությունում և մեր հանրային կյանքի կառուցման գործում: Արժանապատիվ ծերության ապահովումը յուրաքանչյուր պետության վարկանշի և պատվի խնդիրն է: Եվ այդ խնդիրը առաջնահերթվում է ԼՂՀ աշխատանքի և սոցիալական հարցերի նախարարության կողմից իրականացվող քաղաքականության մեջ:
Մեր սիրելի ու մեծահա՛րգ ավագներ, շնորհավորում ենք ձեզ Տարեցների օրվա առթիվ: Մենք` որդիներս, ծնրադրում ենք ձեր վաստակի, ձեր նվիրումի ու անհատույց սիրո առաջ: Մեր ամեն մի քայլ ձեր հայացքով է ուղղորդվում, ամեն մի ձեռնարկում ` ձեր խորհրդով կենսագործվում, բացվող ամեն ճանապարհ ձեր օրհնությամբ է օծվում: Ձեզանից յուրաքանչյուրդ Մեծ եք, քանի որ ծնող եք, Իմաստուն եք, քանի որ փորձով են սրբագործված ձեր խրատները: Դուք ձեր ներկայությամբ անասելի մեծ ու անչափելի կարևոր եք:
Եղե՛ք առողջ, ձեզ մեր կողքին ունենալու համար երախտապարտ ենք. թող այդ ապահովության զգացումը գերակա լինի , ու թող միշտ լինի ձեր ներկայությունը:
ԼՂՀ աշխատանքի և սոցիալական հարցերի նախարար
Ս. ԱՎԱՆԵՍՅԱՆ
