1992 թվականին ՄԱԿ-ի կողմից առաջին անգամ ընդունվել է Հաշմանդամ անձանց իրավունքների մասին կոնվենցիան, և դեկտեմբերի 3-ը տարեցույցում հատկանշվել է որպես հաշմանդամների իրավունքների պաշտպանության օր:
Օրվա առանձնանշումը մարդկությանը հասցեագրված հանձնարարական է, որի կատարումը պիտի լինի յուրաքանչյուր հասարակության արժանապատվության խնդիրը:
ԼՂՀ սոցիալական պաշտպանության ռազմավարության հիմքում այդ խնդիրը մեծապես կարևորվում է, և գործող օրենսդրությունն էլ վկայում է սոցիալական այդ խմբի նկատմամբ դրսևորվող առանձնակի ուշադրության մասին: Հանրային կյանքի կառուցման, առողջ հասարակության ձևավորման գործընթացում հաշմանդամների դերակատարումը առանձնահատուկ է. նրանց ակտիվ ներկայությունը պարտավորեցնող է, նրանց ապրելու կամքն ու արարելու պայքարը դաստիարակող է և ուսանելի: Սահմանափակ հնարավորություններով այդ մարդկանց հոգուց անսահման հույս ու լույս է բխում, նրանք կյանքի նկատմամբ բացառիկ վերաբերմունք ունեն և անխոտոր հավատ: Հասարակական կյանքին իրենց մասնակցությամբ նրանք լավագույնս արժևորում են պիտանի լինելու դասը: Այս` հաշմանդամների իրավունքների պաշտպանության օրվա հատկանշումը հենց այդ հորդորն ունի, որ ուղերձվում է բոլորին:
Այսօր հասարակության մեջ հաշմանդամների լիարժեք ինտեգրումը դեռ մնում է օրակարգային, և դեռևս կան լուծելիք խնդիրներ: Քայլ առ քայլ, համատեղ գործելով, միասին առաջ ենք ընթանում և միասին էլ կհասնենք նախանշված հանգրվանին:
Առողջ եղե’ք և ձեր ոգով մեզ միշտ սատար եղե’ք:
ԼՂՀ աշխատանքի և սոցիալական հարցերի նախարար
Ս. ԱՎԱՆԵՍՅԱՆ
