Այսօր՝ սեպտեմբերի 16-ին, ԱՀ աշխատանքի, սոցիալական և բնակարանային հարցերի նախարար Միքայել Վիրաբյանը հանդիպել է երեխաների աջակցության՝ «Ժպիտ» բարեգործական հասարակական կազմակերպության նախագահ Ռիտա Պետրոսյանի հետ:
Ողջունելով Արցախում նման կազմակերպության ստեղծումը՝ Միքայել Վիրաբյանն իր խոսքում անդրադարձել է երեխաներին առնչվող խնդիրների վերհանման անհրաժեշտությանն ու դրանց լուծման ուղղությամբ անհրաժեշտ մեխանիզմների մշակմանը՝ պատրաստակամություն հայտնելով համագործակցել ցանկացած ծրագրի շուրջ, որը միտված կլինի մատաղ սերնդի բարեկեցությանը և ֆիզիկական ու հոգեկան առողջության պահպանմանը:
Ռ. Պետրոսյանն, իր հերթին, շնորհակալություն է հայտնել նախարարին հանդիպման համար՝ ներկայացնելով կազմակերպության ստեղծման նպատակն ու առաջիկայում իրականացվելիք ծրագրերի տեսլականը:
Կազմակերպության նախագահի խոսքով՝ ուսումնասիրությունները ցույց են տվել, որ Հանրապետության տարբեր շրջաններում և գյուղերում ապրում են բազմաթիվ մանուկներ, ովքեր հատուկ հոգածության կարիք ունեն, և «Ժպիտ»-ի առաջնային նպատակն այդ երեխաներին աջակցելն է լինելու՝ գերակա համարելով նաև հոգեբանական օգնությունը:
Միքայել Վիրաբյանը վստահեցրել է, որ նախարարությունը ջանք ու եռանդ չի խնայի նաև «Ժպիտ» բարեգործական հասարակական կազմակերպության միջոցով նման մանուկներին վերադարձնելու կորցրած ժպիտը:
