ԼՂՀ սոցիալական ապահովության համակարգը բոլորեց իր 80-ամյակը: 1931թ. առ այսօր ոլորտի աշխատողներն իրենց նվիրել են բնակչության սոցիալական պաշտպանության տարաբնույթ խնդիրների լուծմանը: Նրանց` ինքնանվիրում, ուշադիր ու զգայուն վերաբերմունք, ֆիզիկական և հոգեկան ուժերի մեծ լարում պահանջող աշխատանքը չէր կարող չգտնվել ԼՂՀ իշխանությունների տեսադաշտում:
Սոցիալական աշխատողի ոչ դյուրին աշխատանքի արժեվորմանն էր նվիրված 2011թ. հունիսի 14-ին ԼՂՀ Ազգային ժողովի նիստերի մեծ դահլիճում տեղի ունեցած հանդիսավոր արարողությունը: Շնորհավորելով համակարգի հոբելյանի և սոցիալական աշխատողի օրվա առթիվ, ԼՂՀ սոցապահովության նախարար Ն. Ասծատրյանը, մասնավորապես, ասաց. ՙԱյսօր այս դահլիճում ե
ն ոլորտի մի մեծ խումբ աշխատողներ, նրանք, ովքեր իրենց վաստակով, գործին անմնացորդ նվիրվածությամբ ու բարեխղճությամբ արժանի են մեծարանքի: Դուք, որ խորհրդանշում եք նախորդ և ներկա սերունդների կենդանի կապը, ձեր ողջ կարողությունները, փորձն ու գիտելիքները ի սպաս եք դրել համակարգի կայացմանը, նրա լավագույն ավանդույթների պահպանմանն ու բազմապատկմանը՚:
Հանդես գալով արարողությանը` ԼՂՀ Ազգային ժողովի նախագահ Ա. Ղուլյանը շնորհավորանքի ջերմ խոսքեր ուղղեց սոցիալական աշխատողներին, ապա Ազգային ժողովի պատվոգրեր հանձնեց սոցապահովության բնագավառի մի խումբ ներկայացուցիչների:
Սոցիալական աշխատողի օրվա և համակարգի ստեղծման 80-ամյակի կապակցությամբ հանձնվեցին նաև ԼՂՀ կառավարության պատվոգրեր, ԼՂՀ սոցապահովության նախարարի շնորհակալագրեր, ինչպես և թանկարժեք նվերներ:
